Ўзбекистонда хусусий тиббиёт муассасаларига коронавирус тестини ўтказишга рухсат берилди

Ўз 491
Ўзбекистонда 24 июндан бошлаб хоҳловчиларга коронавирусни аниқлаш бўйича тестни нодавлат тиббиёт муассасаларида пулли асосда топширишга рухсат берилди. Бу ҳақда Соғлиқни сақлаш вазирлиги маълум қилди. Фото: «Дарё»«Мамлакатимизда коронавирус инфекциясини эрта аниқлаш кўламини кенгайтириш ва тарқалишининг олдини олиш мақсадида, шунингдек, қатор ташкилот ва фуқароларнинг бу ҳақдаги мурожаатларини эътиборга олиб, жорий йил 24 июндан бошлаб давлат ва нодавлат ташкилотлари ходимлари ҳамда фуқаролар учун ушбу инфекцияга таҳлил топширишда ихтиёрий, пулли асосда нодавлат тиббиёт ташкилотлари хизматларидан ҳам фойдаланиш имконияти яратилди», — дейилади вазирлик хабарида.Эндиликда Соғлиқни сақлаш вазирлиги ҳузуридаги Санитария-эпидемиологик осойишталиги агентлигининг Қорақалпоғистон Республикаси, вилоятлар ва Тошкент шаҳри марказлари билан тегишли тартибдаги шартномани имзолаган ҳамда лабораторияси талабга жавоб бериши тўғрисидаги хулосани олган барча нодавлат тиббиёт ташкилотлари коронавирус инфекциясини фақат полимер занжирли реакция (ПЗР) усулида текшириши мумкин.Соғлиқни сақлаш вазирлиги Лицензиялаш ва аккредитациялаш бошқармаси бошлиғи Фарҳод Раҳимқуловнинг маълум қилишича, ўз лабораториясида коронавирус инфекциясини занжирли полимер реакция усулида, пулли асосда текширишни ташкил этмоқчи бўлган нодавлат тиббиёт ташкилоти, аввало, бу борада белгиланган барча санитария-эпидемиология талабларига риоя қилиши лозим. Текширувда қўлланиладиган тест-синама (диагностикум)лар ҳудудий санитария осойишталиги марказлари билан келишилади. Коронавирус инфекциясини лаборатор шароитида аниқлаш нархини нодавлат тиббиёт ташкилоти мустақил белгилайди.Лаборатор таҳлил учун намуна (суртмалар) нодавлат тиббиёт ташкилотининг ўзида, шу билан биргаликда, сўровга кўра, мурожаат қилувчининг ташкилотида, фуқароларнинг яшаш манзилида ҳамда махсус автотранспортларда олинишига рухсат берилди.Шунингдек, нодавлат тиббиёт ташкилоти ҳудудий санитария осойишталиги марказларига кунлик умумий маълумотларни ҳамда коронавирус инфекциясига ижобий натижа берган суртмаларни етказиб беради.Коронавирус инфекциясини полимер занжирли реакция усулида пулли текширишларни ташкил этишни хоҳловчи нодавлат тиббиёт ташкилотлари Соғлиқни сақлаш вазирлиги ҳузуридаги Санитария-эпидемиологик осойишталиги агентлигининг Қорақалпоғистон Республикаси, вилоятлар ва Тошкент шаҳри марказларига шартнома тузиш учун мурожаат қилишлари мумкин.Ўз навбатида, вазирлик COVID-19’га таҳлилни ўтказиш бўйича шартнома имзолаган нодавлат тиббиёт ташкилотлари тўғрисида қўшимча маълумот беради.Таъкидланишича, мамлакатда фуқаролар учун Соғлиқни сақлаш вазирлиги тизимидаги вирусологик лабораторияларда COVID-19 инфекциясига бепул таҳлилдан ўтиш имконияти яратилган бўлиб, 22 июнь куни 16 897 та, эпидемиологик мавсум давомида эса 1 055 472 та тест синови бепул ўтказилган.Аввалроқ Ўзбекистонда коронавирусга тест топширганлар сони 1 миллиондан ошгани ҳақида хабар берилганди.Мавзуга доир:Ўзбекистонда коронавирусга текширувдан ўтиш тартиби маълум қилинди Ўзбекистонда коронавирус тестини қаерда топшириш мумкин ва унинг нархи қанча?

Manba: Daryo